namaḥ śivāya gurave nādabindukalātmane /
nirañjanapadaṃ yāti nityaṃ yatra parāyaṇaḥ // 4.1 [= tenchap_7.1]

The existence of a maṅgalaśloka here in what appears to be the middle of the text is not going unnoted by the two commentators (śiṣṭācāraprāptaṃ maṅgalaṃ granthamadhye racayati […]). Since the oldest available manuscript from Vārāṇāsī has a only three chapters, this might indicate that the fourth chapter was an addition.

prathamadvitīyatṛtīyopadeśoktānām-āsanakumbhakamudrāṇāṃ phalabhūtaṃ rājayogaṃ vivakṣuḥ svātmārāmaḥ śreyāṃsi bahuvighnānīti tatra vighnabāhulyasya sambhavāt-tannivṛttaye śivābhinnagurunamaskārātmakaṃ maṅgalam-ācarati nama iti / śivāya sukharūpeśvarābhinnāya vā / tad-uktaṃ namas-te nātha bhagavan-śivāya gururūpiṇe iti / gurave deśikāya / yad-vā, gurave sarvāntaryāmitayā nikhilopadeṣṭre śiveśvarāya / tathā ca pātañjalasūtram-pūrveṣām-api guruḥ kālenānavacchedāt [yo.sū. 1.26] iti / namaḥ prahvībhāvo 'stu / kīdṛśāya śivāya ? gurave nādabindukalātmane / kāṃsyaghaṇṭānirhrādavad-anuraṇanaṃ nādaḥ / bindur-anusvārottarabhāvī dhvaniḥ / kalā nādaikadeśaḥ / tā ātmā svarūpaṃ yasya sa tathā tasmai / nādabindukalātmanā vartamānāyety-arthaḥ / tatra nādabindukalātmani śive gurau nityaṃ pratidinaṃ parāyaṇo 'vahitaḥ pumān / etena nādānusandhānaparāyaṇa ity-uktam / pūrvapādena guruśivayor-abhedaś-ca sūcitaḥ / añjanaṃ māyopādhis-tadrahitaṃ nirañjanaṃ śuddham, padyate gamyate yogibhir-iti padaṃ brahma yāti prāpnoti / tathā ca vakṣyati, nādānusandhānasamādhibhājām [4.81] ity-ādinā //1// (jyotsnA_4.1)

athedānīṃ pravakṣyāmi samādhikramam uttamam /
mṛtyughnaṃ ca sukhopāyaṃ brahmānandakaraṃ param // 4.2 [= tenchap_7.2]

uttamam (V) ] lakṣaṇam (R)

samādhikramaṃ pratijānīte: atheti / athāsanakumbhakamudrākathanānataram-idānīm-asminn-avasare samādhikramam pratyāhārādirūpaṃ pravakṣyāmi prakarṣeṇa vivicya vakṣyāmīty-anvayaḥ / kīdṛśaṃ samādhikramam ? uttamam śrīādināthokasapādakoṭisamādhiprakāreṣūtkṛṣṭam / punaḥ kīdṛśam ? mṛtyuṃ kālaṃ hanti nivārayatīti mṛtyughnaṃ svecchayā dehatyāgajanakaṃ tattvajñānodayamanonāśavāsanākṣayaiḥ sukhasya jīvanmuktisukhasyopāyaṃ prāptisādhanam / punaḥ kīdṛśam ? brahmānandakaraṃ paraṃ brahmānandakaraṃ prārabdhakarmakṣaye sati jīvabrahmaṇor-abhedenātyantikabrahmānandaprāptirūpavidehamuktikaram / tatra nirodhasamādhinā cittasya sasaṃskārāśeṣavṛttinirodhe śāntaghoramūḍhāvasthānivṛttau, jīvann-eva hi vidvān-harṣaśokābhyāṃ vimucyate ity-ādiśrutyuktanirvikārasvarūpāvasthitirūpā jīvanmuktir-bhavati / paramamuktis-tu prārabdhabhogānte 'ntaḥkaraṇaguṇānāṃ pratiprasavenaupādhikarūpātyantikanivṛttāv-ātyantikasvarūpāvasthānaṃ pratiprasavasiddham / vyutthānanirodhasamādhisaṃskārā manasi līyante / mano'smitāyām asmitā mahati mahān-pradhān-iti cittaguṇānāṃ pratiprasavaḥ pratisargaḥ svakāraṇe layaḥ / nanu jīvanmuktasya vyutthāne brāhmaṇo 'haṃ manuṣyo 'ham ity-ādi vyavahāradarśanāc-cittādibhir-aupādhikabhāvajananād amlena dugdhasyeva svarūpacyutiḥ syād iti cen-na / samprajñātasamādhau anubhūtātmasaṃskārasya nirodhasaṃskārasya ca tadānīṃ sattvāt / tābhyāṃ ca vyutthānasaṃskārasya dagdhabījakalpatvād-vyutthānavyavahārasyātāttvikatvaniścayāt / atāttvikānyathābhāvasya vikāritvāprayojakatvāt / amlena dugdhasya dadhibhāvas-tu tāttvika iti dṛṣṭāntavaiṣamyāc-ca / puruṣasya tv-antaḥkaraṇopādhiko 'haṃ brāhmaṇa ity-ādivyavahāraḥ sphaṭikasya japākusumasaṃnidhānopādhir-aruṇim-eva na tāttvikaḥ / japākusumāpagame sphaṭikasya svasvarūpasthititvad-antaḥkaraṇasya sakalavṛttinirodhe svasvarūpāvasthitir-acyutaiva puruṣasya //2// (jyotsnA_4.2)

rājayogaḥ samādhiś-ca unmanī ca manonmanī /
amaratvaṃ layas-tattvaṃ śūnyāśūnyaṃ paraṃ padam // 4.3 [= tenchap_8.50]

In the ten-chapter version the two verses containing synonyms of rājayoga comes at the end of chapter 8. Despite transmitting a clearly related passage this version has some important readings.

samādhiparyāyān-viśeṣeṇāha rājayoga ity-ādinā ślokadvayena / spaṣṭam //3-4// (jyotsnA_4.3)

amanaskaṃ tathādvaitaṃ nirālambaṃ nirañjanam /
jīvanmuktiś-ca sahajā turyā cety ekavācakāḥ / 4.4 [= tenchap_8.51]

salile saindhavaṃ yadvat-sāmyaṃ bhajati yogataḥ /
tathātmamanasor-aikyaṃ samādhir-abhidhīyate // 4.5 [= tenchap_7.4]

tribhiḥ samādhim āha: salila iti / yadvat yathā saindhavaṃ sindhudeśodbhavaṃ lavaṇaṃ salile jale yogataḥ saṃyogāt sāmyaṃ salilasāmyaṃ salilaikyaṃ bhajati prāpnoti, tathā tadvad ātmā ca manaś-cātmamanasī tayor-ātmamanasor-aikyam-ekākāratā / ātmani dhāritaṃ mana ātmākāraṃ sadātmasāmyaṃ bhajati, tādṛśam-ātmamanasor-aikyaṃ samādhir-abhidhīyate samādhiśabdenocyate ity-arthaḥ //5// (jyotsnA_4.5)